A voltas coa intelixencia emocional e O MEDO

Dito de forma breve e rápida, a intelixencia emocional ten que ver co coñecemento das propias emocións para logo aprender a manexalas da mellor maneira posible.
Trátase dunha temática relativamente nova que está de moda entre as persoas dedicadas á psicoloxía e o público en xeral. 
En calquera caso déixanos interesantes ensinanzas que poden ser moi útiles como consellos de vida. 

A súa divulgación, iniciada por Daniel Goleman, chega ata Pixar, que coa película Del revés, traslada os principios básicos ata os máis cativos, e a libros como o Emocionario e moitas outras publicacións de gran atractivo.
Agora, en tempo de Samaín é unha boa ocasión para reflexionar en torno ao significado dunha das emocións que sempre se ubica entre as básicas: o medo.

En valores éticos de 1º ESO, coa profesora Marta, dedicaron algunha clase a practicar expresións de emocións sobre pequenos fantasmas -todo con material reciclado- cos que decoramos medio instituto... En 2º ESO escribiron listados sobre aquilo ao que tiñan medo (desde ao Xefe, ou as arañas, serpes e outros bichos ata a non sacar boas notas nun exame, enfermidades, a verse metido en líos, a estar encerrado, a estar en perigo, a non poder volver ao propio país, á morte...) e algúns e algunha estanse a animar a escribir microrrelatos de terror para o concurso da biblioteca.

Ogallá o pasedes de medo durante estes tempos de Samaín!